SHROO ALLAH KE NAAM SE JOH BARE MEHERBAAN NIHAYAT REHEM WALA HAI
1
Lougo Apne Parwardigaar Se Daro Jis Ne Tum Ko Aik Shakhs Se Paida Kia, Yaani Awwal Us Se, Us Ka, Jora Banaya. Phir Un Dono Se Kasrat Se Mard-O-Aurat Padia Kar Ke Roo-E-Zameen Par Phaila Diye.Aur Khuda Se Jis Ke Naam Ko Tum Apni Haajat Bardaari Ka Zariya Banaate Ho Daro Aur Qitaa Moodatt Arhaam Se (Bacho) Kuch Shak Nahi Ke Khuda Tumhain Daikh Raha Hai.
2
Aur Yateemoun Ka Maal Joh Tumhari Tehweel Main Ho, Un Ke Hawale Kar Do Aur Un Ke Pakeeza Aur Umda Maal Ko Apne Naaqis Aur Burre Maal Se Na Badlo. Aur Na Unn Ka Maal Apne Maal Main Mila Kar Khao . Ke Yeh Bara Sakht Gunnah Hai.
3
Aur Agar Tum Ko Is Baat Ka Khof Ho Ke Yateem Larkiyon Ke Baare Main Insaaf Na Kar Sako Ge Toh Unn Ke Siwa Joh Aurtain Tum Ko Pasand Houn, Do Do, Ya Teen Teen, Ya Char Char, Un Se Nikhah Kar Lo. Aur Agar Is Baat Ka Andaisha Ho Ke Sab Aurton Se Yaksaan Salook Na Kar Sako Ge Toh Aik Aurat Kafi Hai, Ya Loundi Jis Ke Tum Malik Ho.Iss Se Tum Be Insaafi Se Bach Jao Ge.
4
Aur Aurton Ko Un Ke Meher Khusi Se De Dia Karo. Haan Agar Woh Apni Khushi Se Us Main Se Kuch Tum Ko Chor Dain, Toh Usse Zoq-O-Shoq Se Kha Lo.
5
Aur Be Aqloun Ko Un Ka Maal Jisse Khuda Ne Tum Lougon Ke Liye Sabab-E-Maeeshat(Way Of Earning) Banaya Hai Mat Do, Haan Us Main Se Un Ko Khilaate Aur Pehnate Raho Aur Un Se Maqool Batain Kehte Raho.
6
Aur Yateemon Ko Baaligh Hone Tak Kaam Kaaj Main Masroof Rakho Phir Baaligh Hone Par Agar Un Mian Aqal Ki Pukhtagai Daikho, Toh Un Ka Maal Un Ke Hawale Kar Do, Aur Is Khof Se Ke Woh Bare Ho Jayain Ge, Yani Bare Ho Kar Tum Se Apna Maal Wapas Le Lain Ge, Is Ko
Fizool Kharchi Aur Jaldi Main Na Ura Dena. Joh Shakhs Aasooda Haal Ho Us Ko Aise Maal Se Qataee Tor Par Parhaiz Rakhna Chahiye Aur Joh Be Maqdoor Ho Woh Munasib Tor Par, Yaani Baqadar Khidmat Kuch Le Le, Aur Jab Un Ka Maal Un Ke Hawale Karne Lago Toh Gawah Kar Liya Kar. Aur Haqeeqat Main Toh, Khuda Hi Gawah Aur Hisaab Lene Wala Kafi Hai.
7
Joh Maal Maan Baap Aur Rishta Daar Chor Marain , Thora Ho Ya Bohot .Us Man Mardoun Ka Bhi Hisaa Hai, Aur Aurton Ka Bhi, Yeh Hisse Khuda Ke Muqarrar Kiye Hue Hian.
8
Aur Jab Meeraas(Joh Kuch Wirasat Main Chora Marne Ke Baad) Ki Taqseem Ke Waqt Gair Waris Rishta Daar Aur Yateem Aur Mohtaaj Aa Jayain Toh Un Ko Bhi Us Main Se Kuch De Dia Kar.Aur Sheereen Kalami Se Paish Aaya Karo.
9
Aur Aise Lougon Ko Darna Chahiye Joh Aisi Halat Main Houn Ke Apne Baad Nannhe Nannhe Bache Chor Jayain, Aur Un Ko Un Ki Nisbat Khof Ho Ke Un Ke Marne Ke Baad Un Bacharon Ka Kia Haal Hoga. Pas Chahiye Ke Yeh Loug Khuda Se Darain Aur Maaqool Baat Kahain.
10
Joh Loug Yateemon Ka Mal Na Jaaiz Tor Par Khate Hain, Woh Apne Pait Main Aag Bharte Hain. Aur Dozakh Main Daale Jayen Ge.
11
Khuda Tumhari Aulad Ke Bare Main Tum Ko Irshaad Farmata Hai Ke Aik Larke Ka Hissa Do Larkiyon Ke Hisse Ke Barabar Hai.Aur Agar Aulaad-E-Maiyat Sirf Larkiyan Hi Houn, Yaani Do Ya Do Se Ziada, Toh Kull Tarke Main Un Ka Do Tehayee2/3rd .Aur Agar Sirf Aik Larki Ho Toh Us Ka Hissa Nisf ½ . Aur Maiyat Ke Maan Baap Ka Yaani Dono Main Se Har Aik Ka Tarke Main Chata(6th) Hissa , Ba-Shart Ye Ke, Maiyat Ke Aulaad Ho. Aur Agar Aulaad Na Ho, Aur Sirf Maan Baap Hi Us Ke Waris Houn Toh Aik Tihayee 1/3rd Maan Ka Hisaa .Aur Agar Maiyat Ke Bhai Bhi Houn Toh Maan Ka Chata 6th Hisaa. Aur Yeh Taqseem Tarka-E-Maiyat Ki Wasiyat Ki Taameel Ke Baad, Joh Us Ne Ki Ho,Ya Qarz Ke Ada Hone Ke Baad, Joh Us Ke Zimme Ho, Amal Main Aye Gi. Tum Ko Maloom Nai Ke Tumhare Baap(Father’s) Daadaaon(Grand Father’s) Aur Baitoun(Son’s) Poutoun(Grand Son’s) Main Se Faaide Ke Lehaz Se Koun Tum Se Ziada Qareeb Hai, Yeh Hisse Khuda Ke Muqarr Kiye Hue Hain Aur Khuda Sab Kuch Jaan-Ne Wala Aur Hikmat Wala Hai.
12
Aur Joh Maal Tumhari Aurtain Chor Marain.Agar Un Ke Aulaad Na Ho Toh Us Main Nisf 1/2nd Hissa Tumhara.Aur Agar Aulaad Ho Toh Tarke Main Tumhara Hissa Chothiyee(1/4th).Lekin Yeh Taqseem Wasiyat Ki Taameel Ke Baad, Joh Unhoun Ne Ki Ho, Ya Qarz Ke Ada Hone Ke Baad Joh Un Ke Zimme Ho, Ki Jaye Gi . Aur Joh Maal Tum Mard Chor Maro.Agar Tumhare Aulad Na Ho Toh Tumhari Aurtoun Ka Is Main Chotha Hissa 4th . Aur Agar Aulad Ho To Un Ka Athwaan 8th Hissa, Yeh Hisse Tumhari Wasiyat Ki Taameel Ke Baaad, Joh Tum Ne Ki Ho, Aur Adaay-E-Qarz Ke Baad Taqseeem Kiye Jayain Ge, Aur Agar Aise Mard Ya Aurat Ki Meeraas Ho Jis Ke Na Baap Ho Na Baita Magar Us Ke Bhai Ya Behen Ho Toh Un Main Se Har Aik Kha Chata(6th) Hisaa Aur Agar Aik Se Ziada Houn Toh Sab Aik Tehayee(1/3rd) Main Shareek Houn Ge, Yeh Hisse Bhi Baad Adaaye-E-Wasiyat-O-Qarz Bashartye Ke Un Se Maiyat Ne Kisi Ka Nuqsaan Na Kia Ho, Taqseem Kiye Jayen Ge Yeh Khuda Ka Farmaan Hai.Aur Khuda Nihayat Ilm Wala Aur Nihayat Hilm Wala Hai.
13
Tamaam Ehkaam(Orders) Khuda Ki Hadain(Limits) Hain. Aur Joh Shakhs Khuda Aur Us Ke Paigambar Ki Farmaabardari(Be Obedient) Kare Ga, Khuda Us Ko Behshaton(Heaven) Main Daakhil Kare Ga, Jin Main Nehrain Beh Rahi Hain, Who Un Main Hamesha Rahain Ge. Aur Yeh Bari Kaamyabi Hai.
14
Aur Joh Khuda Aur Us Ke Rasool Ki Nafarmani(Dis-Obedient) Kare Ga Aur Us Ki Hadoun(Limits) Se Nikal Jaye Ga, Us Ko Khuda Dozakh Main Daale Ga Jahan Woh Hamesha Rahe Ga. Aur Us Ko Zillat Ka Azaab Hoga.
15
Musalmano! Tumhari Aurtoun Main Joh Badkaari Ka Irtikaab(Means She Will Be Bad Character) Kar Baihte Un Par Apne Lougon Main Se Chaar Shakhsoun (Persons) Ki Shahadat Lo. Agar Wo Un Ki Badkaari Ki Gawahi Dain Toh Un Aurton Ko Gharoun Main Band Rakho Yahan Tak Ke Mout Un Ka Kaam Tamaam Kar De Ya Khuda Un Ke Liye Koi Aur Sabeel Paida Kare.
16
Aur Joh Do Mard Tum Main Se Badkaari Karen Toh Un Ko Eeza(Takleef) Do .Phir Agar Wo Touba Kar Lain Aur Naiko Kaar Ho Jaye Toh Un Ka Peecha Chor Do.Beshak Khuda Touba Qabool Karne Wala Aur Meherbaan Hai.
17
Khuda Un Hi Lougon Ki Touba Qabool Farmata Hai Joh Nadaani(Galti Se)Se Buri Harkat Kar Baihte Hain.Phir Jald Touba Qabool Kar Lete Hain.Pas Aise Lougon Par Khuda Meherbani Karta Hai.Aur Wo Sab Kuch Janta Aur Hikmat Wala Hai.
18
Aur Aise Lougon Ki Touba Qabool Nahi Hoti Joh Saari Umar Bure Kaam Karte Rahain .Yahan Tak Ke Jab Un Main Se Kisi Ki Mout Aa Mojood Ho, Toh Us Waqt Kehne Lagain Ke Ab Main Touba Karta Hoon Aur Na Un Ki Touba Qabool Hoti Hai, Joh Kufur Ki Halat Main Marain. Aise Lougon Ke Liye Ham Ne Azaab-E-Aleem Taiyar Kar Rakha Hai.
19
Momino! Tum Ko Jaaiz Nahi Ke Zabardasti Aurton Ke Waris Ban Jao.Aur Daikhna Is Naiyat Se Ke Joh Kuch Tum Ne Un Ko Dia Hai Us Main Se Kuch Le Lo, Unhain Gharaon(Home) Main Mat Rouk Rakhna, Haan Agar Wo Khule Tour Par Badkari Ki Murtakib Houn Toh Rokna Na Munasib Nahi, Aur Un Ke Sath Achi Tarha Se Raho Saho, Agar Wo Tum Ko Na Pasand Houn Toh Ajab Nahi Ke Tum Kisi Cheez Ko Na Pasand Karo , Aur Khuda Us Main Bohot Si Bhaalie Paida Kar De.
20
Aur Agar Tum Aik Aurat Ko Chor Kar Doosri Aurat Karna Chaho . Aur Pehli Aurat Ko Bohat Sa Maal De Chuke Ho, Toh Us Main Se Kuch Mat Lena.Bhala Tum Na Jaaiz Tour Par Aur Sareeh Zulm Se Apna Maal Us Se Wapas Loge?
21
Aur Tum Dia Hua Maal Kiyon Kar Wapas Le Sakte Ho Jab Ke Tum Aik Doosre Ke Sath Sohbat Kar Chuke Ho.Aur Wo Tum Se Ehed-E-Wasiq Bhi Le Chuki Hai.
22
Aur Jin Aurton Se Tumhare Baap Ne Nikaah Kia Ho Un Se Nikaah Na Karna Magar, Jahalat Main Joh Ho Chuka So Ho Chuka, Yeh Nihayat Be Hayaee Aur Khuda Ki Na Khushi Ki Baat Thi.Aur Bohot Bura Dastoor Tha.
23
Tum Par Tumhari Maayen(Mothers) Aur Betiyan(Daughters) Aur Behnain(Sisters) Aur Phoopiyan(Father’s Sister) Aur Khalaayen(Mother’s Sisters) Aur Bhatijiyan(Daughter Of Brother) Aur Bhanjiyan(Daughters Of Sisters) Aur Woh Maayen(Mothers) Jinhon Ne Tum Ko Doodh Pilaya Ho Aur Razayee Behnain Aur Saasain(Mother In Law) Haram Kar Di Gai Hain Aur Jin Aurton Se Tum Taaluuq-E-Jins Rakh Chuke Ho Un Ki Larkiyan Jinhain Tum Parwarish Karte Ho Wo Bhi Tum Par Haram Hain Haan Agar Un Ke Sath Tum Ne Yeh (****** Relation) Taaluq Na Kia Ho Toh Un Ki Larkiyon Ke Sath Nikah Kar Lene Main Tum Par Kuch Gunnah Nahi, Aur Tumhare Salbi ( ) Baitoun Ki Aurtain Bhi Aur Do Behnoun Ka Ikhata Karna Bhi Haraam Hai Magar Joh Ho Chuka So Ho Chuka Be Shak Khuda Bakhashne Wala Aur Rehem Wala Hai.
24
Aur Shohar Wali Aurtain Bhi Tum Par Haraam Hain, Magar Wo Joh Aseer Ho Kar Loundiyon Ke Tour Par Tumhare Qabze Main Aa Jayain, Ye Hukum Khuda Ne Tum Ko Likh Dia Hai, Aur In Mehramaat Ke Siwa Aur Aurtain Tum Ko Halaal Hain, Is Tarha Se Ke Maal Kharch Kar Ke Un Se Nikaah Kar Lo, Bashart-Ye Ke Nikaah Se Maqsood Iffat(Respect) Qaaim Rakhna Ho, Na Ke Shehwat Rani, Toh Jin Aurton Se Tum Faida Hasil Karo Un Ka Meher Muqarrar Kia Ho Ada Kar Do Aur Agr Muqarra Karne Ke Baad Apas Ki Raza Mandi Se Meher Main Kami Baishi Kar Lo Toh Tum Par Kuch Gunnah Nahi, Be Shak Khuda Sab Kuch Jaa-Ne Wala Aur Hikmat Wala Hai.
25
Aur Joh Shakhs Tum Main Se Momin Azaad Aurton Yaani Bibiyon Se Nikaah Karne Ka Maqdoor Na Rakhe, Toh Momin Loundiyon Hi Se, Joh Tumhare Qabze Main Aa Gai Houn Nikah Kar Le, Aur Khuda Tumhare Eemaan Ko Achi Tarha Jaanta Hai, Tum Apas Main Aik Doosre Ke Ham Jins Ho, Toh Un Loundiyaon Ke Sath Un Ke Malikoun Se Ijazat Hasil Kar Ke Nikaah Kar Lo Aur Dastoor Ke Mutabik Un Ka Meher Bhi Ada Kar Do , Bashart-Ye Ke Afeefa( ) Houn, Na Aisi Ke Khullam Khulla Badkari Karain, Aur Na, Darparda Dosti Karna Chahain Phir Agar Nikah Main Aa Kar Badkaari Ka Irtikaab Kar Baithen Toh, Joh Saza Azaad Aurton Yaani Bibiyon Ke Liye Hai Us Ki Aadhi Un Ko Di Jaye, Yeh Loundi Ke Sath Nikaah Karne Ki Ijazat Us Shakhs Ko Hai Jisse Gunnah Kar Baihtne Ka Andaisha Ho Aur Agar Sabar Karo Toh Yeh Tumhare Liye Bohot Acha Hai Aur Khuda Bakhashne Wala Meherbaan Hai.
26
Khuda Chahta Hai Ke Apni Aayatain Tum Se Khol Khol Kar Bayan Farmaye Aur Tum Ko Agle Lougon Ke Tareeqe Bataye Aur Tum Par Meherbani Kare Aur Khuda Jaan-Ne Wala Aur Hikmat Wala Hai.
27
Aur Khuda Toh Chahata Hai Ke Tum Par Meherbani Kare Aur Joh Loug Apni Khuahishon Ke Peeche Chalte Hain Wo Chahate Hain Ke Tum Seedhe Raste Se Bhatak Kar Door Ja Paro.
28
Khuda Chahata Hai Ke Tum Par Se Bojh Halka Kare, Aur Insan Tabaan(By Nature) Kamzor Paida Hua Hai.
29
Momino! Aik Doosre Ka Maal Na Haq Na Khaao Haan Agar Apas Ki Raza Mandi Se Tijarat Ka Lain Dain Ho Aur Us Se Maali Faaida Hasil Ho Jaye, Toh Wo Jaaiz Hai Aur Apne Aap Ko Halaak Na Karo Kuch Shak Nahi Ke Khuda Tum Par Meherbaan Hai.
30
Aur Joh Taaddi( Aggression ) Aur Zulm Se Aisa Kare Ga Hm Us Ko Anqareeb Jahanum Main Daakhil Karain Ge Aur Yeh Khuda Ko Asaan Hai.
31
Agar Tum Bare Bare Gunaahoun Se Jin Se Tum Ko Manaa Kia Jata Hai Ijtinaab(Parhaiz/Rukke) Rakho Ge Toh Ham Tumhare Chote Chote Gunnah Moaaf Kar Dainge Aur Tumhain Izzat Ke Makaanon Main Dakhil Kare Ge.
32
Aur Jis Cheez Main Khuda Ne Tum Main Se Baaz Ko Baaz Par Fazeelat Di Hai Us Ki Hawas Mat Karo, Mardoun(Males)Ko Un Kaamon Ka Sawab Hai, Joh Unhon Ne Kiye Aur Aurton Ko Un Kaamon Ka Sawab Hai Joh Unhoun Ne Kiye Aur Khuda Se Us Ka Fazal-O-Karam Maangte Raho, Kuch Shak Nahi Ke Khuda Har Cheez Se Waqif Hai.
33
Aur Joh Maal Maan Baap Aur Rishta Daar Chor Marain Toh Haq Daaron Main Taqseem Kar Do Ke Ham Ne Har Aik Ke Haqdaar Muqarrar Kar Diye Hain Aur Jin Lougon Se Tum Ehed Kar Chuke Ho Un Ko Bhi Un Ka Hissa Do Be Shak Khuda Har Cheez Ke Saamne Hai.
34
Mard Aurton Par Mussalat-O-Hakim Hain Is Liye Ke Khuda Ne Baaz Ko Baaz Se Afzal Banaya Hai Aur Is Liye Bhi Ke Mard Apna Maal Kharch Karte Hain, Toh Joh Naik Bibiyaan Hain Woh Mardon Ke Hukum Par Chalti Hain Aur Un Ke Peeth Peeche Khud Ki Hifazat Main Maal-O-Aabroo Ki Khabardari Karti Hain Aur Jin Aaurton Ki Nisbat Tumhain Maloom Ho Ke Sar Kashi Aur Badkhoi( ) Karne Lagi Hain Toh Pehle Un Ko Zabaani Samjhaao, Agar Na Samjhain Toh Phir Un Ke Sath Sona Tak Kar Do Agar Is Par Bhi Baaz Na Aayen Toh Zad-O-Kob Karo Aur Agar Farmanbardar Ho Jayen Toh Phir Un Ko Eeza(Takleef) Dene Ka Koi Bahana Mat Dhoondho Be Shak Khuda Sab Se Aala Aur Jaleel-Ul-Qadar Hai.
35
Aur Agar Tum Ko Maloom Ho Ke Miyan Bivi Main An Ban Hai Toh Aik Munsif Mard Ke Khaandaan Main Se Aik Munsif Aurat Ke Khandan Main Se Muqarrar Karo Woh Agar Sullah Kara Daini Chahin Ge Toh Khuda Un Main Muwafiqat Paida Kar De Ga, Kuch Shak Nahi Ke Khuda Sab Kuch Jaanta Aur Sab Baton Se Khabardaar Hai.
36
Aur Khuda Hi Ki Ibadat Karo Aur Us Ke Sath Kisi Cheez Ko Shareek Na Banao Aur Maan Baap Aur Qarabat Waloun Aur Yateeemon Aur Mohtajon Aur Rishta Daar Hamsaayon(Nabours) Aur Ajnabi(Anonymous) Hamsayon Aur Rufqaa-E-Pehlu Yaani Paas Baithne Walon Aur Musafiron Aur Joh Loug Tumhare Qabze Main Hon Sab Ke Sath Ehsaan Karo Ke Khuda Ehsaan Karne Walaon Ko Dost Rakhta Hai Aur Takkabur Karne Wale Barayee Marne Wale Ko Dost Nahi Rakhta.
37
Joh Khud Bhi Bukhal(Kanjoosi )Kare Aur Lougon Ko Bhi Bukhal Sikhayen Aur Joh Maal Khuda Ne Un Ko Apne Fazal Se Ata Farmaya Hai Use Chupa Chupa Ke Rakhain Aur Ham Ne, Na Shukroun Ke Liye Zillat Ka Azaab Taiyaar Kar Rakha Hai.
38
Aur Kharch Bhi Karen Toh Khuda Ke Liye Nahi Balke Lougon Ke Dikhane Ko Aur Eemaan Na Khuda Par Laayen Aur Na Roz-E-Aakhrat Par Aise Lougon Ka Sathi Shaitan Hai Aur Jis Ka Saathi Shaitan Hua Toh Kuch Shak Nahi Ke Wo Bura Sathi Hai.
39
Aur Agar Yeh Loug Khuda Par Aur Roz-E-Qiamat Par Eemaan Laate Aur Joh Kuch Khuda Ne Un Ko Dia Tha Us Main Se Kharach Karte Toh Un Ka Kia Nuqsaan Hota Aur Khuda Un Ko Khoob Janta Hai.
40
Khuda Kisi Ki Zara Bhi Haq Talfi Nahi Karta Aur Agar Naiki Ki Hogi Toh Us Ko Do Chand Kar De Ga Aur Apne Haan Se Ajar-E-Azeem Bakhshe Ga.
41
Bhala Us Din Ka Kia Haal Hoga Jab Ham Har Ummat Main Se Ehwaal Batane Wale Ko Bulayen Ge, Aur Tum Ko Un Lougon Ka Haal Batane Ko Gawah Talab Karen Ge.
42
Us Ruz Kaafir Aur Paighambar Ke Nafarmaan Aarzoo Karen Ge Ke Kaash Un Ko Zameen Main Madfoon Kar Ke Matti Barabar Kar Di Jati, Aur Khuda Se Koi Baat Chupa Nahi Sakain Ge.
43
Momino!Jab Tum Nashe Ki Halt Main Ho Toh Jab Tak Un Alfaz Ko Joh Moon Se Kaho Samajahne Na Lago Namaaz Ke Paas Na Jao Aur Janabat Ki Halat Main Bhi Namaz Ke Paas Na Jao Jab Tak Ke Gusaal Na Kar Lo, Haan Agar Bahalat-E-Safar Raste Chale Ja Rahe Ho Aur Paani Na Milne Ke Sabab Gussal Na Kar Sako Toh Tayammum Kar Ke Namaz Parh Lo Aur Agar Tum Bimaar Ho, Safar Main Ho, Ya Tum Main Se Koi Bait-Ul-Khala Se Ho Kar Aaya Ho Ya Tum Aurton Se Ham Bistar Houe Ho Aur Tumhain Pani Na Mile Toh Paak Matti Lo Aur Moo Aur Hathon Par Masaah Kar Ke Taiyammum Kar Lo Be Shak Khuda Moaaf Karne Wala Aur Bakhashne Wala Hai.
44
Bhala Tum Ne Un Lougon Ko Nahi Daikha Jin Ko Kitaab Se Hissa Dia Gaya Tha Ke Woh Gumrahi Ko Khareedte Hain Aur Chahate Hain Ke Tum Bhi Raste Se Bhatak Jao.
45
Aur Khuda Tumhare Dushmano Se Khoob Waqif Hai, Aur Khuda Hi Kaafi Kaar Saaz Aur Kafi Madadgaar Hai.
46
Aur Ye Joh Yahoodi Hain, In Main Kuch Loug Aise Bhi Hain Ke Kalmaat Ko Un Ke Maqamaat Se Badal Dete Hain, Aur Kehte Hain, Ke Ham Ne Sunn Liya, Aur Nahi Maana Aur Sune Na Sunwaye Jao, Aur Zabaan Ko Maror Kar, Aur Deen Main Taan Ki Raah Se Tum Se Guftugu Ke Waqt Raaina Kehte Hain Aur Agar Youn Kehte, Ke Ham Ne Sun Liya, Aur Maan Liya Aur Sirf Ismaa Aur Raaina Ki Jagha Anzurna Kehte Toh Un Ke Haq Main Behtar Hota Aur Baat Bhi Bohot Durust(Sahee) Hoti Lekin Khuda Ne Un Ke Kufur Ke Sabab Un Par Laanat Kar Rakhi Hai ,Toh Yeh Kuch Thore Hi Eemaan Late Hain.
47
Ae Kitaab Walo! Qabal Is Ke Ke Ham Lougon Ko Moonh(Faces) Bigaar Kar Un Ki Peeth Ki Taraf Phair Dain Ya Un Par Is Tarha Laanat Karen Jis Tarha Hafte Walon Par Ki Thi , Hamari Nazil Ki Hui Kitab Par, Joh Tumhari Kitaab Ki Bhi Tasdeeq Karti Hai Eemaan Le Aao, Aur Khuda Ne Joh Hukum Farmaya So Samajh Lo Ke Ho Chuka.
48
Khuda Us Gunnah Ko Nahi Bakhashe Ga Ke Kisi Ko Us Ka Shareek Banaya Jaye Aur Us Ke Siwa Aur Gunnah Jis Ko Chahe Moaaf Kar De Aur Jis Ne Khuda Ka Shareek Muqarrar Kia Un Ne Bara Bohtaan Baandha.
49
Kia Tum Ne Un Lougon Ko Nahi Daikha Joh Apne Taieen(Themselves) Pakeeza Kehte Hain, Nahi Balke Khuda Hi Jis Ko Chahata Hai Paakeeza Karta Hai Aur Un Par Dhaage Barabar Bhi Zulm Nahi Hoga.
50
Daikho Yeh Khuda Par Kaisa Jhoot Toofaan Baandhte Hain, Aur Yeh Hi Gunnah-E-Sareeh Kafi Hai.
51
Bhala Tum Ne Un Lougon Ko Nahi Diakha Jin Ko Kitaab Se Hissa Dia Gaya Hai Ke Button Aur Shaitaan Ko Maante Hain Aur Kuffar Ke Bare Main Kehte Hain Ke Yeh Loug Mominon Ki Nisbat Seedhe Raste Par Hain.
52
Yeh Hi Loug Hain Jin Par Khuda Ne Laanat Ki Hai Aur Jis Par Khuda Laanat Kare Toh Tum Us Ka Kisi Ko Madadgaar Na Pao Ge.
53
Kia In Ke Paas Baadshaahi Ka Kuch Hissa Hai, Toh Lougon Ko Till Barabar Bhi Na Diange.
54
Ya Joh Khuda Ne Lougon Ko Apne Fazal Se De Rakha Hai, Us Ka Hasad Karte Hain, Toh Ham Ne Khaandaan-E-Ibarahim Ko Kitab Aur Daanayee Inayat Farmaye Thi Aur Saltanat-E-Azeem Bhi Bakhshi Thi.
55
Phir Lougon Main Se Kisi Ne Toh Is Kitaab Ko Mana Aur Koi Is Se Rukka Aur Hata Raha Toh Un Na Maan-Ne Waloun Ke Jalane Ko Dozakh Ki Jalti Hui Aag Kafi Hai.
56
Jin Lougon Ne Hamari Aayaton Se Kufur Kia Un Ko Ham Anqareeb Aag Main Daakhil Karen Ge Jab Un Ki Khaalain(Skin) Gal Aur Jal Jayen Gi Toh Ham Aur Khaalain (Skin) Badal Dainge Taa-Ake Hamesha Azaab Ka Mazah Chakhte Rahain! Be Shak Khuda Gaalib Hikmat Wala Hai.
57
Aur Joh Eemaan Laye Aur Amal-E-Naik Karte Rahe Un Ko Ham Behshaton(Heaven) Main Daakhil Karen Ge Jin Ke Neeche Nehrain Beh Rahi Hain Woh In Main Hamesha Hamesha Rahain Ge Wahan Un Ke Liye Paak Bibiyan Hain, Aur Un Ko Ham Ghane Saye Main Daakhil Karen Ge.
58
Khuda Tum Ko Hukum Deta Hai Ke Amanat Waloun Ki Amaantain Un Ke Hawale Kar Dia Karo Aur Jab Lougon Main Faisla Karne Lago Toh Insaaf Se Faisla Kia Karo, Khuda Tumain Bohot Khoob Nasihat Karta Hai, Be Shak Khuda Sunta Aur Daikhta Hai.
59
Momino! Khuda Aur Us Ke Rasool Ki Farmabardaari Karo Aur Joh Tum Main Se Sahib-E-Hukumat Hain Un Ki Bhi, Aur Agar Kisi Baat Main Tum Main Ikhtilaaf Waaqe Ho Toh Agar Khuda Aur Roz-E-Aakhrat Par Eeman Rakhte Ho Toh Us Main Khuda Aur Us Ke Rasool Ke Hukum Ki Taraf Rujoo Karo, Yeh Bohot Achi Baat Hai Aur Is Ka Maal Bhi Acha Hai.
60
Kia Tum Ne Un Lougon Ko Nahi Daikha Joh Daawa Toh Yeh Karte Hain Ke Joh Kitaab Tum Par Nazil Hui, Aur Joh Kitaabain Tum Se Pehle Naazil Huee Un Sab Par Eemaan Rakhte Hain, Aur Chahte Yeh Hain Ke Apna Muqadma Aik Sarkash Ke Paas Le Ja Kar FaisalaKarayen, Haalaanke Un Ko Hukum Dia Gaya Tha Ke Is Se Aitqaad Na Rakhhe(Don’t Believe On It) Aur Shaitaan Toh Yeh Chahta Hai Ke Un Ko Behka Kar Raste Se Door Daal De.
61
Aur Jab Un Se Kaha Jata Hai Ke Joh Hukum Khuda Ne Nazil Farmaya Hai Us Ki Taraf Rujoo Karo Aur Paighambar Ki Taraf Aao Toh Munafiqon Ki Taraf Aao Toh Munafiqon Ko Daikhte Ho Ke Tum Se Aeraaz Karte Aur Ruke Jate Hain.
62
Toh Kaisi Nadamat Ki Baat Hai Ke Jab Un Ke Aamaal Ki Shamat Se Un Par Koi Museebat Waaqe Hoti Hai, Toh Tumhare Paas Bhaage Aate Hain Aur Qasmain Khate Hain Ke Wallah Hamara Maqsad Toh Bhalai Aur Muwafiqat Tha.
63
In Lougon Ke Diloun Main Joh Kuch Hai, Khuda Us Ko Khoob Janta Hai Tum Un Ki Baton Ko Kuch Khayal Na Karo, Aur Unhain Naseehat Karo Aur Un Se Aisi Baatain Kaho Joh Un Ke Dilon Main Asar Kar Jaayen.
64
Aur Ham Ne Joh Paighambar Bhaija Hai Is Liye Bhaija Hai Ke Khuda Ke Farmaan Ke Mutabiq Us Ka Hukum Mana Jaye, Aur Yeh Loug Jab Apne Haq Main Zulm Kar Baithe The Agar Tumhare Paas Aate Aur Khuda Se Bakhshish Maangte Aur Rasool-E-Khuda Bhi Un Ke Liye Bakhshish Talab Karte, Toh Khuda Ko Moaaf Karne Wala Aur Meherban Paate.
65
Tumhare Parwardigar Ki Qasam Yeh Loug Jab Tak Apne Tanazaat Main Tumhain Munsif Na Banayen, Aur Joh Faisla Tum Kar Do, Us Se Apne Dil Main Tang Na Houn Balke Un Ko Khushi Se Maan Lain Tab Tak Momin Nahi Honge.
66
Aur Agar Ham Inhain Hukum Dete Ke Apne Aap Ko Qatal Kar Daalo, Ya Apne Ghar Chor Kar Nikal Jao Toh In Main Se Thore Hi Aisa Karte Aur Agar Yeh Us Naseehat Par Kaarband(Practical) Hote , Joh Un Ko Ki Jati Hai Toh Un Ke Haq Main Behtar Aur Deen Main Ziada Sabit Qadmi Ka Mojjab (Reason) Hota.
67
Aur Ham Un Ko Apne Haan Se Ajar-E-Azeem Bhi Ata Farmate.
68
Aur Seedha Raasta Bhi Dikhate
69
Aur Joh Loug Khuda Aur Us Ke Rasool Ki Itaa-At Karte Hain Woh Qiamat Ke Roz Un Lougon Ke Sath Houn Ge Jin Par Khuda Ne Bara Fazal Kia, Yaani Ambia Aur Siddique Aur Shaheed Aur Naik Loug, Aur Un Lougon Ki Rafaqat (Relation) Bohot Hi Khoob Hai.
70
Yeh Khuda Ka Fazal Hai Aur Khuda Jaan-Ne Wala Kafi Hai.
71
Momino! Jahaad Ke Liye Hathiyar Le Lia Karo, Phir Ya Toh Jamaat Jamaat Ho Kar Nikla Karo, Ya Sab Ikhate Kooch Kia Karo.
72
Aur Tum Main Koi Aisa Bhi Hai Ke Aamadan(Iraadatan)Dair Lagata Hai .Phir Agar Tum Par Koi Museebat Par Jaye Toh Kehta Hai Ke Khuda Ne Mujh Par Bari Meherbani Ki, Ke Main Un Main Mojood Na Tha.
73
Aur Agar Khuda Tum Par Fazal Kare Toh Is Tarha Se Ke Goya Tum Main Is Main Dosti Thi Hi Nahi, Afsos Karta Aur Kehta Hai Ke Kaash Main Bhi Un Ke Sath Hota Toh Maqsad-E-Azeem Hasil Hota.
74
Toh Joh Loug Aakhrat Ko Khareedte Aur Us Ke Badle Dunia Ki Zindagi Ko Baichna Chahate Hain, Un Ko Chahiye Ke Khuda Ki Raah Main Jung Karain, Aur Joh Shakhs Khuda Ki Raah Main Jung Kare Phir Shaheed Ho Jaye Ya Galba Paaye Ham Anqareeb Us Ko Bara Sawab Dainge.
75
Aur Tum Ko Kia Hua Hai Ke Khuda Ki Raah Main Aur Un Be Bas Mardon (Males)Aur Aurton(Females) Aur Bachon(Kids) Ki Khatir Nahi Larte Joh Duaayen (Prayers) Kia Karte Hain, Ke Ae Parwardigar Ham Ko Is Sheher Se Jis Ke Rehne Wale Zalim Hain Nikaal Kar Kaheen Aur Le Ja. Aur Apni Taraf Se Kisi Ko Hamara Haami Bana. Aur Apni Hi Taaraf Se Kisi Ko Hamara Madadgaar Muqarrar Farma.
76
Joh Momin Hain Woh Toh Khuda Ke Liye Larte Hain, Aur Joh Kafir Hain Woh Button Ke Liye Larte Hain So Tum Shaitan Ke Madadgaron Se Laro.Aur Daro Mat, Kion Ke Shaitan Ka Daao Booda Hota Hai.
77
Bhala Tum Ne Un Lougon Ko Nahi Daikha Jin Ko Pehle Yeh Hukum Dia Gaya Tha Ke Apne Hathon Ko Jung Se Roke Raho Aur Namaaz Parhte Aur Zakaat Dete Raho, Phir Jab Un Par Jahan Farz Kar Dia Gaya, Toh Baaz Loug Un Main Se Lougon Se Youn Darne Lage Jaise Khuda Se Dara Karte Hain, Balke Is Se Bhi Ziada Aur Burburane Lage Ke Ae Khuda Tu Ne Ham Par Jahad Jald Kion Farz Kar Dia, Thori Muddat(Time)Aur Hamain Kion Mohlat Na Di, Ae Paigambar In Se Keh Do Ke Dunia Ka Faaida Bohot Thora Hai Aur Bohot Achi Cheez Toh Parhaizgaar Ke Liye Nijaat-E-Aakhrat Hai, Aur Tum Par Dhaage Barabar Bhi Zulm Nahi Kia Jaye Ga.
78
Ae Jahad Se Darne Walo! Tum Kaheen Raho Mout Toh Tumhain Aakar Rahe Gi, Khua Bare Bare Mehlon Main Raho Aur Un Lougon Ko Agar Koi Faaida Pohonchata Hai, Toh Kehte Hain Yeh Khuda Ki Taraf Se Hai Aur Agar Koi Guzand(Nuqsan) Pohonchta Hai Toh, Ae Muhammad S.A.W. Tum Se Kehte Hain Ke Yeh Guzand Ap Ki Waja Se Hamain Pohoncha Hai, Keh Do Ke Ranj-O-Rahat Sab Allah Hi Ki Taraf Se Hai Un Lougon Ko Kia Ho Gaya Hai Ke Baat Bhi Nahi Samajh Sakte.
79
Ae Adam Zaad Tujh Ko Joh Faida Pohonche Woh Khuda Ki Taraf Se Hai Aur Joh Nuqsaan Pohonche Woh Teri Hi Shamat-E-Aamaal(Aamaal Ki Wajha Se) Ki Wajha Se Hai, Aur Ae Muhammad S.A.W.Ham Ne Tum Ko Lougon Ki Hidayat Ke Liye Paigambar Bana Kar Bhaija Hai Aur Is Baat Ka Khuda Hi Gawah Kaafi Hai.
80
Joh Shakhs Rasool Ki Farmabardaari Kare Ga, Toh Be Shak, Us Ne Khuda Ki Farmaabardaari Ki Aur Joh Nafarmabardari Kare Toh Ae Paigambar Tumhain Ham Ne Un Ka Nigehbaan Bana Kar Nahi Bhaija.
81
Aur Yeh Loug Moonh Se Toh Kehte Hain Ke Aap S.A.W Ki Farmabardaari Dil Se Manzoor Hai, Lekin Jab Tumhare Paas Se Chale Jate Hain Toh Un Main Se Baaz Loug Raat Ko Tumhari Baton Ke Khilaaf Mashware Karte Hain, Aur Joh Mashware Yeh Karte Hain Khuda Un Ko Likh Leta Hai, Toh Un Ka Kuch Khayal Na Karo Aur Khuda Par Bharosa Rakho Aur Khuda Hi Kaafi Kaar Saaz Hai.
82
Bhala Yeh Quraan Main Gour Kion Nahi Karte?Agar Yeh Khuda Ke Siwa Kisi Aur Ka Kalam Hota Toh Is Main Bohot Sa Ikhtilaaf Pate.
83
Aur Jab Un Ke Paas Aman Ya Khof Ki Koi Khabar Pohonchti Hai, Toh Us Ko Mashhoor Kar Dete Hain, Aur Agar Us Ko Paigambar Aur Apne Sardaron Ke Paas Pohonchate, Toh Tehqeeq Karne Wale, Us Ki Tehqeeq Kar Lete, Aur Agar Tum Par Khuda Ka Fazal Aur Us Ki Meherbani Na Hoti Toh Chand Ashkhaas Ke Siwa Sab Shaitan Ke Pairo Ho Jate.
84
Toh Ae Muhammad S.A.W Tum Khuda Ki Raah Main Laro Tum Apne Siwa Kisi Ke Zimme Daar Nahi Ho Aur Momino Ko Bhi Targeeb Do, Qareeb Hai Ke Khuda Kaafiron Ki Larayee Ko Band Kar De, Aur Khuda Larayee Ke Aitbaar Se Bohot Sakht Hai Aur Saza Ke Lehaz Se Bhi Bhot Sakht Hai.
85
Joh Shakhs Naik Baat Ki Sifarish Kare, Toh Us Ko Us Ke Sawab Main Se Hissa Mile Ga, Aur Joh Buri Baat Ki Sifarish Kare Us Ko Us Ke Azaab Main Se Hissa Mile Ga, Aur Khuda Har Cheez Par Qudrat Rakhta Hai.
86
Aur Jab Tum Ko Koi Dua De Toh Jawab Main Tum Us Se Behtar Kalme Se Usse Dua Do, Ya Un Hi Alfaaz Se Dua Do Be Shak Khuda Har Cheez Ka Hisaab Lene Wala Hai.
87
Khuda Wo Maabood Barhaq Hai, Ke Us Ke Siwa Koi Ibadat Ke Laaiq Nahi Wo Qiamat Ke Din Tum Sab Ko Zaroor Jama Kare Ga, Aur Khuda Se Barh Kar Baat Ka Sacha Koun Hai?
88
Toh Kia Sabab Hai Ke Tum Munafiqon Ke Bare Main Do Guroh Ho Rahe Ho Halanke Khuda Ne Un Ko Un Ke Kartootoun Ke Sabab Oundha Kar Dia Hai, Kia Tum Chahate Ho Ke Jis Shakhs Ko Khuda Ne Gumraah Kar Dia Hai Us Ko Raste Par Le Aao, Aur Jis Shakhs Ko Khuda Gumrah Kar De Tum Us Ke Liye Kabh Bhi Rasta Nahi Paao Ge.
89
Wo Toh Yeh Hi Chahate Hain Ke Jis Tarha Wo Khud Kaafir Hain Usi Tarha Tum Bhi Kafir Ho Kar Sab Barabar Ho Jao, Toh Jab Tak Wo Khuda Ki Raah Main Watan Na Chor Jaayen Un Main Se Kisi Ko Dost Na Banana Agar Tark-E-Watan Ko Qabool Na Karen Toh Un Ko Pakar Lo Aur Jahaan Paao Qatal Kar Do Aur Un Main Se Kisi Ko Apna Rafeeq Aur Madad Gaar Na Banao.
90
Magar Joh Loug Aise Lougon Se Ja Mile Houn, Jin Main Aur Tum Main Sullah Ka Ehed Ho, Ya Is Haal Main Ke Un Ke Dil Tumhare Sath Ya Apni Qoum Ke Sath Larne Se Ruk Gaye Houn, Tumhare Paas Aa Jayen Toh Eitiraaz Zaroori Nahi, Aur Agar Khuda Chahata Toh Un Ko Tum Par Gaalib Kar Deta, Toh Wo Tum Se Zaroor Larte, Phir Agar Wo Tum Se Jung Karne Se Kinara Kashi Karen Aur Larain Nahi, Aur Tumhari Taraf Sulaah Ka Paigaam Bhaijen, Toh Khuda Ne Tumahre Liye Un Par Zabardasti Karne Ki Koi Sabeel Muqarrar Nahi Ki.
91
Tum Kuch Loug Aur Aise Bhi Pao Ge Joh Yeh Chahate Hain Ke Tum Se Bhi Aman(Peace) Main Rahain, Aur Apni Qoum Se Bhi Aman (Peace) Maim Rahain, Lekin Jab Fitna Angaizi Ko Bulaye Jaaye, Toh Us Main Oundhe Moon Girr Parain Toh Aise Loug Agar Tum Se Larne Se Kinara Kashi Na Karen , Aur Na Tumhari Taraf Paigaam-E-Sulah Bhaijhain Aur Na Apne Hathon Ko Rokain, Toh Un Ko Pakar Lo Aur Jaahn Paao Qatal Kar Do, Un Lougon Ke Muqable Main Ham Ne Tumhare Liye Sanad Sareeh Muqarrar Kar Di Hai.
92
Aur Kisi Momin Ko Shayaan Nahi Ke Momin Ko Maar Dale Magar Bhool Kar, Aur Joh Bhool Kar Bhi Momin Ko Maar Dale, Toh Aik Toh, Aik Musalmaan Ghulaam Azaad Kara De Aur Doosre Maqtool Ke Warison Ko Khoon Baha De, Haan Agar Wo Moaaf Kar Dain Toh Un Ko Ikhtyaar Hai, Agar Maqtool Tumhare Dushmanon Ki Jamaat Main Se Ho Aur Wo Khud Momin Ho Toh Sirf Aik Musalmaan Ghulaam Azaad Karna Chahiye, Aur Agar Maqtool Aise Lougon Main Se Ho Jin Main Aur Tum Main Sulaah Ka Ehed Ho, Toh Waarisaan-E-Maqtool Ko Khoon Baha Dena Aur Aik Musalmaan Ghulaam Azaad Karma Chahiye, Aur Jis Ko Yeh Moyasar Na Ho Wo Mutwatar Do Maheene Ke Roze Rakhe Yeh Kuffara Khuda Ki Taraf Se Qubool-E-Touba Ke Liye Hai Aur Khuda Sab Kuch Jaanta Aur Bari Hikmat Wala Hai.
93
Aur Joh Shakhs Musalmaan Ko Qasdann(Jaan Boojh Kar) Maar Dale Ga Toh Us Ki Saza Dozakh Hai Jis Main Wo Hamesha Jalta Rahe Ga, Aur Khuda Us Par Gazabnaak Hoga, Aur Us Par Laanat Kare Ga Aur Aise Shakhs Ke Liye Us Ne Bara Sakht Azab Taiyaar Kar Rakha Hai.
94
Momino! Jab Tum Ne Khuda Ki Raah Main Bahir Nikala Karo Toh Tehqeeq Se Kaam Liya Karo Aur Joh Shakhs Tum Se Salam-O-Alaik Kare Us Se Yeh Na Kaho Ke Tum Momin Nahi Ho Aur Us Se Tumhari Garz Yeh Ho Ke Dunia Ki Zindagi Ka Faaida Hasil Karo, So Khuda Ke Nazdeek Bohot Si Ganeemtain Hain, Tum Bhi Toh Pehle Aise Hi The Phir Khuda Ne Tum Par Ehsaan Kia Toh Aainda Tehqeeq Kar Liya Karo Aur Joh Amal Tum Karte Ho Khuda Ko Sab Ki Khabar Hai.
95
Joh Musalmaan Gharon Main Baith Rehte, Aur Larne Se Ji Churate Hain, Aur Koi Uzar Nahi Rakhte Wo, Aur Joh Khuda Ki Raah Main Apne Maal Aur Jaan Se Larte Hain Wo, Dono Barabar Nahi Ho Sakte, Maal Aur Jaan Se Jahaad Karne Walon Ko Baith Rehne Walon Par Allah Ne Darje Main Fazeelat Bakhshi Hai, Aur Go Naik Waada Sab Se Hai Lekin Ajar-90E-Azeem Ke Lehaaz Se Khuda Ne Jahaad Karne Waloun Ko Baith Rehne Walon Par Kaheen Fazeelat Bakhshi Hai.
96
Yaani Khuda Ki Taraf Se Darjaat Main Aur Bakhshish Main ,Aur Rehmat Main, Aur Khuda Bare Bakhashne Wala Aur Meherban Hai.
97
Joh Loug Apni Jaanon Par Zulm Karte Hain Jab Farishte In Ki Jaan Qabaz Karne Lagte Hain, Toh Un Se Poochte Hain Ke Tum Kis Haal Main The Wo Kehte Hain Ke Ham Mulk Main Aajiz-O-Natawaan The, Farishte Kehte Hain Kia Khuda Ka Mulk Faraakh Nahi Tha Ke Tum Us Main Hijrat Kar Jate, Aise Lougon Ka Thikana Dozak Hai Aur Who Buri Jagha Hai.
98
Haan Joh Mard Aur Aurtain Aur Bache, Be Bas Hain, Ke Na Toh Koi Chaara Kar Sakte Hain, Aur Na Raasta Jaante Hain.
99
Qareeb Hai Ke Khuda Aison Ko Moaaf Kar De Aur Khuda Moaaf Karne Wala Aur Bakhashne Wala Hai.
100
Aur Joh Shakhs Khuda Ki Raah Main Ghar Baar Chor Jaye, Wo Zameen Main Bohot Si Jagha Aur Kushaaish Paaye Ga, Aur Joh Shakhs Khuda Aur Rasool Ki Taraf Hijrat Kar Ke Ghar Se Nikal Jaye Phir Us Ko Mout Aa Pakre, Toh Us Ka Sawab Khuda Ke Zimme Ho Chukka, Aur Khuda Bakhashne Wala Meherbaan Hai.
101
Aur Jab Tum Safar Ko Jao Toh Tum Par Kuch Gunnah Nahi Ke Namaaz Ko Kam Kar Ke Parho Bashart Ye Ke Tum Ko Khof Ho Ke Kaafir Loug Tum Ko Aiza(Takleef) Dainge Be Shak Kaafir Tumhare Khulle Dushman Hain.
102
Aur Ae Paigambar! Jab Tum Un Mujahedeen Ke Laskhar Main Ho, Aur Un Ko Namaaz Parhaane Lago, Toh Chahiye Ke Un Ki Aik Jamaat Tumhare Sath Mussalah(Armed) Ho Kar Khari Rahe, Jab Wo Sajda Kar Chukain Toh Pare Ho Jayen, Phir Doosri Jamaat Jis Ne Namaaz Nahi Parhi Un Ki Jaga Ayaye Aur Hoshiyaar Aur Mussalah Ho Kar Tumhare Sath Namaz Ada Kare, Kafir Is Ghaat(Taak) Main Hain Ke Tum Zara Apne Hathiyaron Aur Samaan Se Gafil Ho Jao Ke Tum Par Yakbaargi(Aik Dam/Achanak) Hamla Kar Dain, Agar Tum Barish Ke Sabab Takleef Main Ho, Ya Bimaar Ho Toh Tum Par Kuch Gunnah Nahi Ke Hathiyaar Utaar Rakho Magar Hoshiyaar Zaroor Rehna Khuda Ne Kafiron Ke Liye Zillat Ka Azaab Taiyaar Kar Rakha Hai.
103
Phir Jab Namaz Tamaam Kar Chuko Toh Khare Aur Baithe Aur Laite Har Halat Main Khuda Ko Yaad Karo Phir Jab Khof Jata Rahe Toh Is Tarhha Se Namaaz Parho Jis Tarha Aman(Peace) Ki Halat Main Parhte Ho, Be Shak Namaaz Ka Mominon Par Ouqaat-E-Muqqarra (Fixed Time) Main Ada Karma Farz Hai.
104
Aur Kuffar Ka Peecha Karne Main Susti(Laziness) Na Karna Agar Tum Be Araam Hote Ho, Toh Jis Tarha Tum Bae Araam Hote Ho Usi Tarha Wo Bhi Be Araam Hote Hain, Aur Tum Khuda Se Aisi Aisi Umeedain Rakhte Ho, Joh Wo Nahi Rakh Sakte Aur Khuda Sab Kuch Jaanta Aur Bari Hikmat Wala Hai.
105
Ae Paighambar Ham Ne Tum Par Sacchi Kitaab Nazil Ki Hai Taa-Ake Khuda Ki Hidayat Ke Mutabiq Lougon Ke Muqaddamat Ka Faisla Karo, Aur Daikho Dagha Bazon Ki Himayat Main Kabhi Behes Na Karna.
106
Aur Khuda Se Bakhsshish Maangna, Be Shak Khuda Bakhashne Wala Meherbaan Hai.
107
Aur Joh Loug Apne Ham Jinson Ki Khiyanat Karte Hain Un Ki Taraf Se Behes Na Karna Kion Ke Khuda Khaayain (Khayanat Karne Waaloun) Aur Murtakib Juraim Ko Dost Nahi Rakhta.
108
Yeh Lougon Se Toh Chupte Hain Aur Khuda Se Nahi Chupte Halanke Jab Wo Ratoun Ko Aisi Batoun Ke Mashware Kia Karte Hain Jin Ko Wo Pasand Nahi Karta,Toh Un Ke Sath Hua Karta Hai Aur Khuda Un Ke Tamaam Kamon Par Ahaata Kiye Hue Hai.
109
Bhala Tum Loug Dunia Ki Zindagi Main Toh Un Ki Taraf Se Behes Kar Lete Ho, Qiamat Ko Un Ki Taraf Se Khuda Ke Sath Koun Jhagre Ga, Aur Koun Un Ka Wakkeel Bane Ga?
110
Aur Joh Shakhs Koi Bura Kaam Kar Baithe Ya Apne Haq Main Zulm Kar Le Phir Khuda Se Bakhshish Maange, Toh Khuda Ko Bakhshne Wala Aur Meherbaan Paye Ga.
111
Aur Joh Koi Gunnah Karta Hai, Toh Us Ka Wabaal Usi Par Hai Aur Khuda Jaan-Ne Wala Aur Hikmat Wala Hai.
112
Aur Joh Shakhs Koi Qasoor Ya Gunnah Toh Khud Kare, Lekin Is Se Kisi Be Gunnah Ko Mohtim Kar De Toh Us Ne Bohtaan Aur Sareeh Gunnah Ka Bojh Apne Sar Par Rakha.
113
Aur Agar Tum Par Khuda Ka Fazal Aur Meherbani Na Hoti Toh Un Main Se Aik Jamaat Tum Ko Behkaane Ka Qasad (Faisla) Kar Hi Chuki Thi, Aur Yeh Apne Siwa Kisi Ko Behka Nahi Sakte Aur Na Tumhara Kuch Bigaar Sakte Hain, Aur Khuda Ne Tum Par Kitaab Aur Daanaaye Nazil Farmaye Hai Aur Tumhain Wo Baatain Sikhaye Hain Joh Tum Jaante Nahi The Aur Tum Par Khuda Ka Bara Fazal Hai.
114
Un Lougon Ki Bohot Se Mushhwaratain Achi Nahi, Haan Us Shakhs Ki Mashwaarat Achi Ho Sakti Hai Joh Khairaat Ya Naik Baat Ya Lougon Main Sulaah Karne Ko Kahe, Aur Joh Aise Kaam Khuda Ki Khusnoodi Hasil Karne Ke Liye Kare Ga Toh Ham Us Ko Bara Sawaab Dainge.
115
Aur Joh Shakhs Seedha Rasta Maloom Hone Ke Baad Paigambar Ki Mukhalifat Kare, Aur Momino Ke Raste Ke Siwa Aur Raste Par Chale Toh Jidhar Wo Chala Hai Ham Use Udhar Hi Chalne Dain Ge Aur Qiamat Ke Din Jahanammum Main Dakhil Karen Ge Aur Wo Buri Jaga Hai.
116
Khuda Un Ke Gunnah Ko Nahi Bakhshe Ga, Ke Kisi Ko Us Ka Shareek Banaya Jaye Aur Us Ke Siwa Aur Gunnah Jis Ko Chahe Ga Bakhsh De Ga.Aur Jis Ne Khuda Ke Sath Shareek Banaya Wo Raste Se Door Ja Para.
117
Yeh Joh Khuda Ke Siwa Joh Parastish Karte Hain Toh Aurton Hi Ki, Aur Pukarte Hain Toh Shaitaan Sarkash Hi Ko.
118
Jis Par Khuda Ne Laanat Ki Hai, Joh Khuda Se Kehne Laga, Main Tere Bandon Se Ghair-E-Khuda Ki Nazar Dilwa Kar, Maal Ka Aik Muqarrar Hissa Le Liya Karon Ga.
119
Aur Un Ko Gumrah Karta Aur Umeedain Dilata Rahoonga, Aur Yeh Sikhata Rahoon Ga Ke Janwaron Ke Kaan Cheerte Rahain Aur Yeh Bi Kehta Rahoonga Ke Wo Khuda Ki Banayee Hui Soorton Ko Badalte Rahain, Aur Jis Shakhs Ne Khuda Ko Chor Kar Shaitan Ko Dost Banaya, Wo Sareeh Nuqsaan Main Par Gaya.
120
Wo Un Ko Waade (Promise) Deta Hai Aur Umeedain Dilata Hai Aur Joh Kuch Shaitaan Unhain Wade Deta Hai Woh Dhoka Hi Dhoka Hai
121
Aise Lougn Ka Thikana Jahannum Hai.Aur Wo Wahan Se Mukhlisi Nahi Pa Sakain Ge.
122
Aur Joh Loug Eemaan Laye Aur Naik Kaam Karte Rahe Un Ko Ham Behshaton Main Daakhil Karain Ge, Jin Ke Neeche Nehrain Jari Hain. Abad-Ul-Abaad In Main Rahain Ge. Yeh Khuda Ka Sacha Waada Hai. Aur Khuda Se Ziada Baat Ka Sacha Koun Ho Sakta Hai.
123
Nijaat Na Toh Tumhari Aarzooun Par Hai, Aur Na Ehl-E-Kitaab Ki Aarzoouon Par. Joh Shakhs Bure Aamaal Kare Ga Use Usi Tarha Ka Badla Dia Jaye Ga, Aur Wo Khuda Ke Siwa Na Kis Ko Himayiti Paye Ga Aur Na Madadgaar.
124
Aur Joh Naik Kaam Kare Ga, Mard Ho Ya Aurat, Aur Wo Sahib-E-Eemaan Bhi Hoga, Toh Aise Loug Behshat Main Dakhil Hounge Aur Un Ki Till Barabar Bhi Haq Talfi Na Ki Jaye Gi.
125
Aur Us Shakhs Se Kis Ka Deen Acha Ho Sakta Hai, Jis Ne Hukum-Ekhuda Ko Qabool Kia, Aur Wo Naiko Kar Bhi Hai. Aur Ibrahim Ke Deen Ka Pairo Hai Joh Yaksoon Muslamaan The Aur Khuda Ne Ibrahim Ko Apna Dost Banaya Tha.
126
Aur Aasmaan Aur Zameen Main, Joh Kuch Hai Sab Khuda Hi Ka Hai. Aur Khuda Har Cheez Par Aahaate Kiye Hue Hai.
127
Ae Paigambar Loug Tum Se Yateem (Orphan) Aurton Ke Bare Main Fatwa Talab Karte Hain. Keh Do Ke Khuda Tum Ko Un Ke Sath Nikaah Karne Ke Moaamle Main Ijazat Deta Hai, Aur Joh Hukum Is Kitaab Main Pehle Dia Gaya Hai Wo Un Yateem Aurton Ke Bare Main Hai Jin Ko Tum Un Ka Haq Toh Dete Nahi, Aur Khuahish Rakhte Ho Ke Un Ke Sath Nikaah Kar Lo Aur Neez Bechare Be Kas Bachon Ke Bare Main. Aur Yeh Bhi Hukum Deta Hai Ke Yateemon Ke Bare Main Insaaf Par Qaaim Raho. Aur Joh Bhaliyee Tum Karo Ge Khuda Us Ko Jaanta Hai.
128
Aur Agar Kisi Aurat Ko Apne Khawind (Husband) Ki Taraf Se Ziaadti Ya Be Raghbati Ka Andaisha Ho Tum Miyan Bivi (Husband And Wifes) Par Kuch Gunnah Nahi Ke Apas Main Kisi Qaraardad Par Sulah Kar Lain. Aur Sulaah Khoob Cheez Hai Aur Tabiyatain Toh Bukhal Ki Taraf Mail Hoti Hain, Aur Agar Tum Naiko Kari Aur Parhaizgari Karo Ge Toh Khuda Tumhare Sab Kamon Se Waqif Hai.
129
Aur Tum Khuaah Kitna Hi Chaho Aurton Main Har Giz Barabri Nahi Kar Sako Ge, Toh Aisa Bhi Na Karna Ke Aik Hi Ki Taraf Dhal Jao, Aur Doosri Ko Aisi Halat Main Chor Do Ke Goya Adhar Main Latak Rahi Hai Aur Agar Apas Main Muwafiqat Kar Lo Aur Parhaizgari Karo Toh Khuda Bakhashne Wala Meherbaan Hai.
130
Aur Agar Miyan Bivi Main Muwafiqat (Understanding) Na Ho Sake Aur Aik Doosre Se Juda Ho Jayain, Toh Khuda Har Aik Ko Apni Dolat Se Ghani Kar De Ga Aur Khuda Bari Kushaaish Wala Aur Hikmat Wala Hai.
131
Aur Joh Kuch , Aur Joh Kuch Zameen Main Hai Sab Khuda Hi Ka Hai. Aur Jin Lougon Ko Tum Se Pehle Kitab Di Gai Thi Un Ko Bhi Aur Ae Muhammad S.A.W. Tum Ko Bhi, Ham Ne Hukum Taakeedi Kia Hai Ke Khuda Se Darte Raho Aur Agar Kufur Karo Ge Toh Samajh Rakho Ke Joh Kuch Aasmano Main Aur Joh Kuch Zameen Main Hai Sab Khuda Hi Ka Hai.Aur Khuda Be Parwah Aur Saaza Waar-E-Hamd-O-Sana Hai.
132
Aur Phir Sun Rakho, Ke Joh Kuch Aasmano Main Aur Joh Kuch Zameen Main Hai Sab Khuda Hi Ka Hai Aur Khuda Hi Kaar Saz Kafi Hai.
133
Logo!Agar Wo Chahe Toh Tum Ko Fana Kar De Aur Tumhari Jaga Aur Lougon Ko Paida Kar De. Aur Khuda Is Baat Par Qadir Hai.
134
Joh Shakhs Dunia Main Amlon Ki Jaza Ka Talib Ho Toh Khuda Ke Paas Dunia Aur Aakhrat Dono Ke Liye Ajar Mojood Hain. Aur Khuda Sunta Daihkta Hai.
135
Ae Eemaan Walo! Insaaf Par Qaaim Raho Aur Khuda Ke Liye Sachi Gawahi Do, Khuah Us Main Tumhara Ya Tumhare Maan Paap Aur Rishta Daron Ka Nuqsan Hi Ho. Agar Koi Ameer Hai Ya Faqeer Toh Khuda Un Ka Khair Khuah Hai. Toh Tum Khuahis-E-Nafs Ke Peeche Chal Kar Adal Ko Na Chor Dena. Agar Tum Paich Daar (Ghuma Phira Kar) Shahadat Do Ge Ya Shahadat Se Bachna Chaho Ge Toh Jaan Rakho Khuda Tumhare Sab Kamon Se Waqif Hai.
136
Momino! Khdua Par Aur Us Ke Rasool Par Aur Joh Kitaab Us Ne Apne Paigambar Aakhir-Uz-Zamaan Par Nazil Ki Hai Aur Joh Kitabain Us Se Pehle Naazil Ki Theen Sab Par Eemaan Lao. Aur Joh Shakhks Khuda Aur Us Ke Farishton Aur Us Ki Kitabon Aur Us Ke Paigambaron Aur Roz-E-Qiamat Se Inkaar Kare Wo Raste Se Bhatak Kar Door Ja Para.
137
Joh Loug Eemaan Laye Phir Kafir Ho Gaye, Phir Eemaan Laye Phir Kafi Ho Gaye, Phir Kufur Main Barhte Gaye Un Ko Khuda Na Toh Bakhshe Ga Aur Na Seedha Rasta Dikhaye Ga.
138
Ae Paigambar Munafiqon Yaani Do Rukhe Lougon Ko Bisharat Suna Do Ke Un Ke Liye Dukh Dene Wala Azaab Taiyaar Hai.
139
Joh Momino Ko Chor Kar Kaafiron Ko Dost Banate Hain. Kia Yeh Un Ke Haan Izat Hasil Karna Chahte Hain, Toh Izzat Toh Sab Khuda Hi Ki Hai.
140
Aur Khuda Ne Tum Mominon Par Apni Kitaab Main Yeh Huykum Nazil Farmaya He Ke Jab Tum Kaheen Suno Ke Khuda Ki Aayaton Se Inkar Ho Raha Hai, Aur Un Ki Hansi Urayee Jati Hai, Toh Jab Tak Wo Loug Aur Batain Na Karne Lagain, Un Ke Paas Mat Baitho. Warna Tum Bhi Unhi Jaise Ho Jao Ge. Kuch Shak Nahi Ke Khuda Munafiqon Aur Kaafiron Sab Ko Dozakh Main Ikhatta (Combine) Karne Wala Hai.
141
Joh Tum Ko Daikhte Rehte Hain, Agar Khuda Ki Taraf Se Tum Ko Fatah Mile Toh Kehte Hain Kia Ham Tumhare Sath Na The. Aur Agar Kafiron Ko Fatah Naseeb Ho, Toh Un Se Kehte Hain Ke Kia Ham Tum Par Galib Nahi The, Aur Tum Ko Musalmanon Ke Hath Se Bachaya Nahi.Toh Khuda Tum Main Qiamat Ke Din Faisla Kar De Ga.Aur Khuda Kafiron Ko Momino Par Har Giz Ghalba Nahi De Ga.
142
Munafiq In Chaloun Se Apne Nazdeek Khuda Ko Dhoka Dete Hain, Yeh Us Ko Kia Dhoka Dainge Wo Un Hi Ko Dhoke Main Daalne Wala Hai, Aur Jab Yeh Namaaz Ko Khare Hote Hain Toh Susst Aur Kaahil Ho Kar, Sirf Lougon Ke Dikhane Ko Aur Khuda Ki Yaad Hi Nahi Karte Magar Bohot Kam.
143
Beech Main Pare Latak Rahe Hain Na Un Ki Taraf Hote Hain Na In Ki Taraf, Aur Jis Ko Khuda Bhatkaye Toh Us Ke Liye Kabhi Bhi Rasta Na Pao Ge.
144
Ae Ehl-E-Eemaan ! Momino Ke Siwa Kafiroun Ko Dost Na Banao, Kia Tum Chahate Ho Ke Apne Oopar Khuda Ka Sareeh Ilzaam Lo?
145
Kuch Shak Nahi Ke Munafiq Loug Dozakh Ke Sab Se Neeche Ke Darje Main Hounge.Aur Tum Un Ka Kisi Ko Madad Gaar Na Pao Ge.
146
Haan Jinhon Ne Touba Ki Aur Apni Halat Ko Durust Kia Aur Khuda Ki Rassi Ko Mazboot Pakra Aur Khaas Allah Ke Farmabardaar Ho Gaye Toh Aise Loug Momino Ke Zummre Main Honge Aur Khuda Anqareeb Momino Ko Bara Sawab De Ga.
147
Agar Tum Khuda Ke Shukar Guzaar Ho, Aur Us Par Eemaan Le Aao Toh Khuda Tum Ko Azaab De Kar Kia Kare Ga. Aur Khuda Toh Qadar Shanaas Aur Daana Hai.
148
Khuda Is Baaat Ko Pasand Nahi Karta Ke Koi Kisi Ko Aailaaniya Bura Kahe, Magar Wo Joh Mazloom Ho. Aur Khuda Sab Kuch Sunta Aur Jaanta Hai.
149
Agar Tum Loug Bhaliyee Khullam Khulla Karo Ge, Ya Chupa Kar, Ya Buraye Se Darguzar Karo Ge, Toh Khuda Bhi Moaaf Karne Wala Aur Sahib-E-Qudrat Hai.
150
Joh Loug Khuda Se Aur Us Ke Paigambaron Se Kufur Karte Hain Aur Khuda Aur Us Ke Paigambaron Main Farq Karna Chahate Hain Aur Kehte Hain Ke Ham Baaz Ko Maante Hain Aur Baaz Ko Nahi Maante Aur Eemaan Aur Kufur Ke Beech Main Aik Raah Nikaalna Chahate Hain.
151
Wo Bila Ishtiha (No Doubt) Kaafir Hain, Aur Kafiron Ke Liye Ham Ne Zillat Ka Azaab Taiyaar Kar Rakha Hai.
152
Aur Joh Loug Khuda Aur Us Ke Paigambaron Par Eemaan Laye Aur Un Main Se Kisi Main Farq Na Kia, Yaani Sab Ko Maana Aise Lougon Ko Wo Anqareeb Un Ki Naikiyon Ke Sile Ata Farmay Ga, Aur Khuda Bakhashne Wala Meherbaan Hai.
153
Ae Muhammad S.A.W. Ehl-E-Kitaab Tum Se Darkhuast (Request) Karte Hain Ke Tum Un Par Aik Likhi Hui Kitaab Aasmaan Se Utaar Laao, Toh Yeh Mooosa Se Is Se Bhi Bari Bari Darkhuastain Kar Chuke Hain, Un Se Kehte The Hamain Khuda Zaahir, Yaani Aankhon Se Dikha Do, So Un Ke Gunnah Ki Wajha Se Un Ko Bijli Ne Aa Pakra. Phir Khuli Nishaniyan Aye, Peeche Bachre Ko Maabood Bana Baithe, Toh Us Se Bhi Ham Ne Dar Guzar Kia. Aur Moosa Ko Sareeh(Saaf) Ghalba (Victory) Dia.
154
Aur Un Se Ehed(Promise) Lene Ko Ham Ne Un Par Koh-E-Toor Utha Khara Kia, Aur Unhain Hukum Dia Ke Sheher Ke Darwaze Main Dakhil Hona Toh Sajda Karte Hue Daakhil Hona Aur Yeh Bhi Hukum Dia Ke Hafte Ke Din Machaliyan Pakarne Main Tajawuzz, Yani Hukum Ke Khilaaf Na Karna. Gharz Ham Ne Un Se Mazboot Ehed Liya.
155
Lekin Unhon Ne Ehed Ko Tor Daala, Toh Un Ke Ehed Tor Dene Aur Khuda Ki Aayaton Se Kufur Karne Aur Ambiaya Ko Na Haq Maar Daalne Aur Yeh Kehne Ke Sabab Ke Hamare Diloun Par Parde Pare Hue Hain. Khuda Ne Un Ko Mardood Kar Dia Aur Un Ke Diloun Par Parde Nahi Hain Balke Un Ke Kufur Ke Sabab Khuda Ne Un Par Mohor Kar Di Hai, Toh Yeh Kam Hi Eemaan Late Hain.
156
Aur Un Ke Kufur Ke Sabab Aur Maryam Par Aik Bohtaan-E-Azeem Baandhne Ke Sabab.
157
Aur Yeh Kehne Ke Sabab Ke Ham Ne Maryam Ke Bete (Son) Eesaa Maseeh Ko Joh Khuda Ke Paigambar Kehlae The Qatal Kar Dia Hai Khuda Ne Un Ko Malaoon (Laanti/Cursed ) Kar Dia Aur Unhon Ne Eesaa Ko Qatal Nahi Kia Aur Na Unhain Sooli (Hang) Par Charhaya Balke Un Ko Un Ki Si Soorat Malom Hui, Aur Joh Loug Un Ke Bare Main Ikhtilaf Karte Hain Wo Un Ke Haal Se Shak Main Pare Hue Hain Aur Paiwi-E-Zan (Shak) Ke Siwa Un Ko Is Ka Mutliq Ilm Nahi.Aur Unhon Ne Eesa Ko Yaqeenan Qatal Nahi Kia.
158
Balke Khuda Ne Un Ko Apni Taraf Utha Liya.Aur Khuda Ghaalib Aur Hikmat Wala Hai.
159
Aur Koi Ehl-E-Kitaab Nahi Hoga Magar Un Ki Mout (Death) Se Pehle Un Par Eeman Le Aye Ga. Aur Wo Qiamat Ke Din Un Par Gawah Houn Ge.
160
Toh Ham Ne Yahoodiyon Ke Zulmon Ke Sabab Bohot Si Pakeeza Cheezain Joh Un Ko Halaal Theen Un Par Haraam Kar Dee, Aur Is Sabab Se Bhi Ke Wo Aksar Khuda Ke Raste Se Lougon Ko Rokte The.
161
Aur Is Sabab Se Bhi Ke Ba Wajood Mana Kiye Jane Ke, Sood Lete The Aur Is Sabab Se Bhi Ke Lougon Ka Maal Na Haq Khate The.Aur Un Main Se Joh Kafir Hain Un Ke Liye Ham Ne Dard Dene Wala Azaab Taiyaar Kar Rakha Hai.
162
Magar Joh Loug In Main Se Ilm Main Pakke Hain Aur Joh Momin Hain Wo Is Kitaab Par, Joh Tum Par Naizil Hui Aur Joh Kitabain Tum Se Pehle Naazail Hueen, Sab Par Eemaan Rakhte Hain Aur Namaz Parhte Hain Aur Zakat Dete Hain Aur Khuda Aur Roz-E-Aakhrat Ko Maante Hain. Un Ko Ham Anqareeb Ajar-E-Azeem Dain Ge.
163
Ae Muhammad S.A.W. Ham Ne Tumharei Taraf Usi Tarha Wahi Bhaiji Hai, Jis Tarha Nooh Aur Un Se Pichle Paigambaron Ki Taraf Bhaiji Thi. Aur Ibraheem Aur Ismaail Aur Ishaaq Aur Yaqoob Aur Aulaad-E-Yaqoob Aur Eesa Aur Aiyoob Aur Younus Aur Haroon Aur Sulaimaan Ki Taraf Bhi Ham Ne Wahi Bhaiji Thi, Aur Daawood Ko Ham Ne Zaboor Bhi Inayat Ki Thi.
164
Aur Bohot Se Paigambar Hain Jin Ke Halaat Ham Tum Se Paishtar (Pehle) Biyaan Kar Chuke Hain, Aur Bohot Se Paigambar Hain Jin Ke Halaat Tum Se Biyaan Nahi Kiye.Aur Moosa Se Toh Khuda Ne Batain Bhi Kee.
165
Sab Paigambaron Ko Khuda Ne Khushkhabri Sunane Wale Aur Darane Wale Bana Kar Bahija Tha, Taa-Ake Paigambaron Ke Aane Ke Baad Lougon Ko Khuda Par Ilzaam Ka Moqa Na Rahe Aur Khuda Gaalib Hikmat Wala Hai.
166
Lekin Khuda Ne Joh Kitaab Tum Par Naizil Ki Hai, Us Ki Nisbat Khuda Gawahi Deta Hai, Ke Us Ne Apne Ilm Se Nazil Ki Hai Aur Farishte Bhi Gawahi Dete Hain. Aur Gawah Toh Khuda Hi Kafi Hai.
167
Jin Lougon Ne Kufur Kia Aur Lougon Ko Khuda Ke Raste Se Roka Wo Raste Se Bhatak Kar Door Ja Pare.
168
Joh Loug Kafir Hue Aur Zulm Karte Rahe, Khuda Un Ko Bakhashne Wala Nahi Aur Na Unhain Rasta Hi Dikhaye Ga.
169
Haan Dozakh Ka Rasta Jis Main Wo Hamesha Jalte Rahinge. Aur Yeh Baat Khuda Ko Asaan Hai.
170
Lougo! Khuda Ke Paighabmar Tumahre Paas Tumahre Parwardigaar Ki Taraf Se Haq Baat Le Kar Aye Hain, Toh Un Par Eemaan Lao Yeh Tumhare Haq Main Behtar Hai. Aur Agar Kufur Karo Ge Toh Jaan Rakho Ke Joh Kuch Aasmaano Aur Zameen Main Hai Sab Khuda Hi Ka Hai Aur Khuda Sab Kuch Jaan-Ne Wala, Aur Hikmat Wala Hai.
171
Ae Ehl-E-Kitaab Apne Deen Ki Baat Main Had Se Na Barho Aur Khuda Ke Baare Main Haq Ke Siwa Kuch Na Kaho. Maseeh Yaani Maryam Ke Bete (Son) Eesa, Na Khuda The, Na Khuda Ke Bete, Balke Khuda Ke Rasool Aur Us Ka Kalma-E-Bisharat The, Joh Us Ne Maryam Ki Taraf Bhaija Tha, Aur Us Ki Taraf Se Aik Rooh The, Toh Khuda Aur Us Ke Rasooloun Par Eeman Lao. Aur Yeh Na Kaho, Ke Khuda Teen Hain. Is Aitqaad (Yaqeen) Se Baaz Aao Ke Yeh Tumhare Haq Main Behtar Hai .Khuda Hi Maabood-E-Wahid Hai Aur Is Se Paak Hai Ke Is Ke Aulad Ho. Joh Kuch Aasmaanon Main Aur Joh Kuch Zamen Main Hai Sab Usi Ka Hai.Aur Khdua Hi Kaarsaaz Kafi Hai.
172
Maseeh Is Baat Se Aar Nahi Rakhte Ke Khuda Ke Bande Houn Aur Na Muqrab Farishte Aar Rakhte Hain, Aur Joh Shakhs Khuda Ka Banda Hone Ko Moujab Aar Samjhe, Aur Sarkashi Kare Toh Khuda Sab Ko Apne Paas Jama Kar Le Ga.
173
Toh Joh Loug Eemaan Laye Aur Naik Kaam Karte Rahe Wo Un Ko Un Ka Poora Badla De Ga, Aur Apne Fazal Se Kuch Ziada Bhi Inayat Kare Ga. Aur Jinhoun Ne Banda Hone Se Aar-O-Inkar Aur Takabbur Kia Un Ko Wo Takleef Dene Wala Azaab De Ga. Aur Wo Khuda Ke Siwa Apna Haami Aur Madadagar Na Paayen Ge.
174
Logo Tumhare Parwardigaar Ki Taraf Se Tumahre Paas Daleel Roshan Aa Chuki Hai Aur Ham Ne Kufur Aur Zalalat Ka Andhaira Door Karne Ko Tumhare Taraf Chamakta Hua Noor Bhaij Dia Hai.
175
Pas Joh Loug Khuda Par Eemaan Laaye Aur Us Ke Deen Ki Rassi Ko Mazboot Pakre Rahe Un Ko Wo Apni Rehmat Aur Fazal Ki Behshaton Main Dakhil Kare Ga.Aur Apni Taraf Pohonchne Ka Seedha Raste Dikhaye Ga.
176
Ae Paigambar Loug Tum Se Kalala Ke Bare Main Hokum-E-Khuda Daryaaft Karte Hain Keh Do Ke Khuda Kalala Ke Bare Main Yeh Hukum Deta Hai Ke Agar Koi Aisa Mard Mar Jaye Jis Ke Aulad Na Ho Aur Na Maan(Mother) Baap(Father) Aur Us Ke Behen(Sister) Ho Toh Us Ko Bhai(Brother) Ke Tarke Main Se Aadha Hissa Mile Ga.Aur Agar Behen(Sister) Mar Jaye Aur Us Ke Aulad Na Ho .Us Ke Tamam Maal Ka Waris Bhai Hoga Aur Agar Marne Wale Bhai Ki Do Behnain Houn Toh Dono Ko Bhai Ke Tarke Main Se Do Tihaaye(2/3rd) .Aur Agar Bhai Aur Behen Yani Mard Aur Aurtain Mile Jule Waris Houn Toh Mard(Male) Ks Hissa Do Aurtoun (Two Females) Ke Barabar Hai.Yeh Ehkaam Khuda Tumse Isliey Biyaan Fermata Hai Ke Bhatakte Na Phiro.Aur Khuda Har Cheez Se Waqif Hai.
—SADAQALLAH-UL-AZEEM—