78-Soorah-Al-Naba-Aayaat-40

Racer_Fashion

Racer_Fashion

78-Soorah-Al-Naba-Aayaat-40

Shroo Allah Ke Naam Se Joh Bara Meherbaan Aur Nihayat Rehem Farmane Wala Hai.

1

Ye Loug Kis Cheez Ki Nisbat Poochte Hain?

2

Kia Bari Khabar Ki Nisbat?

3

Jis Main Ye Ikhtilaaf Kar Rahe Hain.

4

Daikho Ye Anqareeb Jaan Lainge.

5

Phir Daikho Ye Anqareeb Jaan Lain Ge.

6

Kia Ham Ne Zameen Ko Bichona Nahi Banaya.

7

Aur Pahaaroun Ko Us Ki Maikhain Nahi Thehraaya?

8

Be Shak Banaya Aur Tumko Jora Jora Bhi Paida Kia.

9

Aur Neend Ko Tumhare Liye Moojjab-E-Aaraam Banaya.

10

Aur Raat Ko Parda Muqarrar Kia.

11

Aur Din Ko Moaash Ka Waqt Qaraar Dia.

12

Aur Tumhare Oopar Saat(7) Mazboot Aasmaan Banaye.

13

Aur Aftaab Ka Roshan Chiraagh Banaya.

14

Aur Nucharte Baadloun Se Moosla Dhaar Meenh Barsaaya.

15

Taa-Ake Us Se Anaaaj Aur Sabza Paida Karain.

16

Aur Ghane Ghane Baagh.

17

Be Shak Faisle Ka Din Muqarrar Hai.

18

Jis Din Soor Phoonkha Jaye Ga, Toh Tum Loug Ghat Ke Ghat Aa Mojood Hoge.

19

Aur Aasmaan Khola Jaye Ga, Toh Us Main Darwaze Ho Jayen Ge.

20

Aur Pahar Chalaye Jaayenge Toh Wo Rait Ho Kar Reh Jaye Ge.

21

Be Shak Dozakh Ghaat Main Hai.

22

Yaani Sarkashoun Ka Wo Hi Thikana Hai.

23

Us Main Wo Muddatoun Pare Rahainge.

24

Wahan Na Thandak Ka Mazah Chakhain Ge. Na Kuch Peena Naseeb Hoga.

25

Magar Garm Paani Aur Behti Peep.

26

Ye Badla Hai Poora Poora.

27

Ye Loug Hisaab-E-Aakhrat Ki Umeed Hi Nahi Rakhte The.

28

Aur Hamari Ayatoun Ko Jhoot Smajh Kar Jhutlaate Rehte The.

29

Aur Ham Ne Har Cheez Ko Likh Kar Zabt Kar Rakha Hai.

30

So Ab Mazah Chakho. Ham Tum Par Azaab Hi Barhaate Jaaye Ge.

31

Be Shak Parhaiz Gaaroun Ke Liye Kaamyabi Hai.

32

Yaani Baagh Aur Angoor.

33

Aur Ham Umar Noujawan Aurtain.

34

Aur Sharab Ke Chalakte Hue Gilaas.

35

Wahan Na Behooda Baat Sunain Ge Na Jhoot Kharafaat.

36

Ye Tumhare Parwardigar Ki Taraf Se Sila Hai, Inaam Muttaiyan.

37

Wo Joh Aasmaanoun Aur Zameen Aur Joh In Dono Main Hai, Sab Ka Malik Hai, Bara Meherbaan Kisi Ko Us Se Baat Karne Ka Yaara Na Hoga.

38

Jis Din Rooh-Ul-Ameen Aur Farishte Saff Bandh Kar Khare Ho Jayenge,  Toh Koi Boul Na Sake Ga, Magar Jis Ko Khuda-E-Rehmaan Ijazat Bakhshe Aur Us Ne Baat Bhi Durust Kahi Ho.

39

Ye Din Barhaq Hai. Pas Joh Shaksh Chahe Apne Parwardigar Ke Pas Thikana Bana Le.

40

Ham Ne Tum Ko Azaab Se Joh Anqareeb Aane Wala Hai Aagaah Kar Dia Hai, Jis Din Har Shakhs Un Aamaal Ko Joh Us Ne Aage Bhaije Hounge, Daikh Le Ga Aur Kafir Kahe Ga, Ke Ae Kaash Main Matti Hota.

Racer_Fashion

2 responses on “78-Soorah-Al-Naba-Aayaat-40

.
.
%d bloggers like this: